成都麗江昆明pre-wedding之旅 - Day 4 (Private)

 

26/4

終於嚟到品果pre-wedding嘅第一日喇, 今日好好天呀, 好開心呢!! 李剛尋日原本話會叫 driver 車我哋去佢哋宿舍, 叫我哋9:30am係街口等, 點知行行吓就見到李剛... 哈哈, 原來driver 有d事趕唔切嚟, 所以佢就親自過嚟接我哋搭的士去喇, 認真俾面! 沿途仲見到玉龍雪山個真身呀...今日冇雲遮住佢, 所以好靚仔, 不過我哋唔係今日上去, 所以希望聽日都咁好天啦!

好快就到咗品果宿舍喇, 今日有4對新人影相呢, 由於呢排係旺季, 所以日日早上都咁熱鬧呢!  換完衫嬌嬌就開始幫我化妝喇, 第一套係著自帶嘅旗袍同唐裝衫!~

            

嬌嬌超快手呀, 係我試過咁多個MUA中最快手嘅一個...個令鍾就攪掂個妝+頭, 而且都好靚呢, 好有古典氣息!~ 之後輪到Kenneth 化喇, 嬌嬌話佢個頭好容易攪, 因為d頭髮自動會彈起...笑 C...

         

撞番 Edith 同 Martin, 梗係影番張相先啦!!! 一切ready, 正式出發!~

           

我哋嘅拍攝團隊: 攝影李剛 + 打燈吳廸 + 化妝嬌嬌 (**特別多謝嬌嬌同我哋影咗好多拍攝花絮呢)

~相相 all from my 傻瓜機~

 

第1站: 大研古城

           

嘩, 好靚呀, 睇哂 d 屋頂ga! 真係好好太陽, 好溫暖, 我就連暖包都冇貼呢! 剛哥好鬼攪笑, 成日逗雞眼引我哋笑, 哈哈! 套衫都好sharp好襯呀, 佢哋個個都讚, 仲問我哋結婚嗰日會唔會著返呢套tim, haha!

       

 

         

 

         

呢度影吓, 嗰度影吓, 話咁快就影到差唔多1點, 又係食午餐嘅時間!~ 佢哋帶咗我哋去食川菜, 應該佢哋嘅係飯堂la! 都唔錯呀, 百零蚊, 都好好味!!! 之後就返宿舍換衫轉頭喇!~

          

 

第2站: 唔知咩地方, 有空曠嘅草坪+雪山遠景

        

雖然唔知呢個係咩地方, 不過影吓影吓, 又影咗好多...條石牆仲差d俾我整到倒塌, 嚇c...

         

 

第3站: 玉柱擎天

 

         

大家仲記唔記得木王(山寨王) 呢? 呢度就係佢度假嘅別墅喇, 幾識嘆!~ 不過呢樹好多蚊仔...好討厭呀...

            

影完後, 轉埋頭同換婚紗, 向油菜花田出發!

 

第4站: 油菜花田

好好彩, 仲搵到靚靚嘅油菜花田, 不過當地人而家好醒, 已經慢慢改種一 d 種係唔開咁多花嘅油菜花, 咁就可以避免 d 人成日行入去花田踩爛哂 d 花花喇...所以真係要識搵先得!

          

第5站: 拉市海

天色好好, 太陽伯伯仲高高掛! 拉市海景色真係好靚, 冇想像中咁多'市', hehe!~ 剛哥好快就拖咗2隻馬馬嚟喇~ 原本想要白色馬, 不過佢哋話白色嗰d 唔乖, 成日郁嚟郁去!  哈哈, 唔知真定假, 所以又是但啦!~

上馬時唔小心坐到個頭紗甩咗, 所以都係之後先加番!~ 我隻馬馬真係好乖好乖呀, 仲郁都唔郁, 開頭Kenneth 係咁撩佢食草, 但後尾嬌嬌話見佢瞓咗wor, 好攪笑! Kenneth 話feel到佢隻馬馬係咁震...我心諗, 梗係啦, 你咁有'份量', 真係登佢'慘', hehe!~

        

             

落地後加番頭紗又影, 又去船仔影, 好快我哋就攪掂, 執堆嘢又返宿舍換衫轉頭喇, 因為之後要影夜景呢!

         

         

第6站: 麗江古城夜景

換完衫轉完頭都仲係6點幾7點, 個天仲未黑, 所以就去咗食晚飯先! 原本話去束河古城影, 不過我要放水燈, 所以就要係麗江古城呢邊影喇! 今晚都食川菜, 都幾好味, 又係百零蚊, 超抵!

            

8 點幾開始影, 好開心呀, 因為還咗放水燈嘅心願!~ 大家咁夜仲好認真, 令我覺得好感動呢!

                

最後影到9點半倒, 笑都笑到'硬'哂, 剛哥一句'今日最後一張', 大家都好開心, 因為可以收工!~ haha!~ 同佢哋bye bye 後, 我哋都返客棧喇, 因為要早 d 休息迎接聽日雪山嘅挑戰!!! (今晚好叻, 冇再蕩失路...) 不過我當然識做, 就係等埋12點, 同 Kenneth倒數埋生日先瞓啦, haha!~ 祝你今年搵多d (然後俾哂老婆), 同埋身體健康啦! hehe!~