Kenden 2歲 + 細B Kenvix 出世喇!

懶吓懶吓, 攪到成年冇update 個blog, 各位blog友好嗎?


係呢年真係好Busy, 因為我哋第2個Baby Kenvix 5 月出世喇, 所以Kenden 做咗大哥哥了!


Kenden 都算錫細佬啦, 係有時肉緊咗大力咗, 睇實D就冇問題.


Kenden & Kenvix:

係屋企開咗Mini Birthday Party

Kenden 你大個囝喇, 仲就嚟返學, 祝你快高長大, 同細佬相親相愛!!!

Kenden 1歲喇! Yeah!

由於我呢個媽媽實在太懶豬嘅關係, 寫寫吓又唔得閒...攪到寫呢篇blog 已經係 Kenden 1歲記錄喇!

 

 

回想起呢一年, Kenden由一團粉團成長到而家百厭活潑嘅臭豬豬, 真係點點滴滴在心頭! 祝你身體健康, 開開心心, 媽媽就滿足喇!  Kenden 仲未識自己行行, 而家係爬得好快同要扶住嘢行, 仲成日咬我同婆婆 (慘...) >.< 知你出牙仔辛苦喇, 不過可唔好咬人嗎?

 

 

幾日嘅生日活動, 令大家都好busy^^

 

 

8月1 日正日生日:

 

多謝blog 友艾利絲介紹, 我哋成功BOOK咗生日去 myfamily studio影免費相相! 影足1個鐘, 還好Kenden算係合作, 係後尾先有D唔耐煩呢! 攞哂相底都係$360, 但要等3個月後先有相攞, 但都好抵啊!

 

 

    之後休息一會, 我哋連同公公婆婆出發去TST 食 tea buffet! 睇吓佢食得幾開心!^^

 

 



      最後, 返到屋企當然要食生日蛋糕啦! 今次預備咗個'K'字蛋糕, 好襯'K'字頭嘅 Kenden! 祝你身體健康, 快高長大, 精乖令利, 日日都開心笑口常開！

 

    
      8月2日:

  早前參加咗荷花爬爬大賽, KENDEN 叻叻進入咗爬行組決賽, 所以我咃又一家人去支持Kenden喇!不過今次Kenden大概係俾好大聲嘅咪嚇親, 只掛住喊唔肯爬, 所以只得小組第5名! 但爸爸媽媽都以你為榮啊！叻叻豬！

     

   8月3日:

   今日係Kenden 嘅1 歲生日會! 好開心請到好多好朋友嚟到一同慶祝, 真係好開心!

 

   特別訂造了小王子生日蛋糕:

 

 

Backdrop + Balloons:

 

大合照:

一家3口:

 

多謝大家,Kenden好開心玩到成個下午都唔使瞓!

 

 

仲有利是同禮物收, 最開心係你啦!^^

 

Kenden......BaBa MaMa love you so much! 祝你愉快平安!

 

 

 

     

 

 

 

 

 

 

 

 

Kenden @ 9 個月

Kenden 9 個月喇!

回想起你由一粒米發展到而家識爬識企, 點點滴滴在心頭!

你要繼續開開心心健健康康啊!

------------------------------------------------------------------------------------------

上個月Easter, 由於公公婆婆回鄉探親, 咁我就做咗一星期FTM 喇!

開頭未習慣其實都幾辛苦, 超忙! 好在有老公同家姐幫手, 總算任務完成!

不過Kenden變得勁'痴'身 (但我覺得好窩心)...而家已回復正常'痴'返婆婆!^^

 

對完一個星期後第一日返工...嗲到呢...試問邊個捨得去返工?

27/4, 係老公生日! 之前一晚一家人食CAKE 慶祝!

之後就帶咗Kenden 去參加爬爬大賽! Kenden好叻叻, 雖然對住好多哥哥姐姐, 但一D都唔執輸, 仲贏得呢場分組賽第一名送俾DADDY, 叻叻豬!!!

晚上 2 公婆蛇咗出去食BUFFET, 祝老公年年搵多D, 開開心心, SWEET SWEET! LUF!

 

9 個月喇, 呢個百厭星真係冇時停...唔係360度轉身, 就係爬SOFA... 睇少陣都唔得, 仲要FREE FALLING 跳落婆婆度...唉...

 

 

 

由於Kenden 太曳曳了...所以俾媽媽整蠱, kekeke!!!

 

 

 

11/5, 係我哋一起過嘅第一個母親節, 多謝Kenden 送給媽媽同婆婆嘅第一個母親節禮物, BB展爬爬比賽分組第一名, 錫哂您：3

 

多謝Kenden!!! 仲同我哋分享最愛星星餅!!! Kiss Kiss!

 

 

Kenden @ 8 個月

今日Kenden 8 個月大喇!

呢個月Kenden 學識爬爬同自己扶住企起身喇, 不得不驚嘆佢真係天天都進步!

一放係床仔就企起身... 真係要看牛咁看喇...

 

 

爬爬爬...企企企...

 

 

呢張相見到2隻牙仔! ^^

 





願你天天快樂健康!

Kenden @ 7 個月

話咁快 Kenden 已經 7 個幾月喇, 原來真係會唔捨得佢大得大快GA!
願你努力成長, 天天開心媽媽就放心喇!


我最鍾意整蠱Kenden, 但佢扮女仔又扮得好開心喎! 哈哈!

 

呢個貪玩豬...7個月人仔已經自己扶住企起床仔...仲要攞埋盒濕巾嚟玩...放係床又周圍爬 @_@...真係睇少一眼都唔得...

 

坐車仔坐到好威咁, 服咗你! 其實真係太累要放你自己坐吓!

 

 

 另外 9/3 join 咗媽媽會嘅半歲 party, Kenden 玩得好開心呢! 仲發現Kenden已經可自己坐穩喇!

繼續努力呀!

恭喜發財, 馬年好運！

恭喜發財!

話咁快馬年已經到喇, 祝大家心想事成, 身體健康, BB 快高長大, 精乖伶俐!

KENDEN同大家拜個年先！

大年初2 係 Kenden 嘅半歲生日,　所以一定唔少得食蛋糕呢個節目啦！
媽媽希望你日日都開心，日日都笑口常開，健健康康！

 睇住你由最初嘅一舊飯團，成長到而家日日反身，8 掛好動力充沛嘅人仔，實在感覺到你大得好快啊！媽媽會好好記往的！

2月14號係情人節＋元宵，不過我要去飲，所以未能倍兩位大小情人，唯有第2日先補返啦！　祝天下有情人甜甜蜜蜜，　sweet sweet!

 



Happy New Year!!! 新年快樂!!!

2014來了! 新年快樂呀!

總結2013年, 最重要嘅事情一定係Kenden嘅來臨, 雖然懷孕過程一波幾百折...所有嘢都依然瀝瀝在目!

其實中間有好多嘢都冇話俾人知, 只有老公同我默默承受, 諗返起真係壓力爆晒燈, 無啦啦都會喊一大餐, 如果再嚟多次真係咪話唔驚! (順便多謝老公嘅愛護!)

但好好彩, 呢D都係上天對我哋嘅考驗, 我哋最終過哂D關, KENDEN都順利降臨...

2014年, 只要你健健康康, 開開心心, 咁我哋就心滿意足喇!

Love U!

-----------------------------------------------------------------------------------------------

1/1/2014, Kenden 五個月大喇, 我哋去咗公園影紅葉! 呢個囝最鍾意影相, 一見影機就傻笑!

原來同 Kenden 已經相處咗五個月喇, 覺得時間真係過得好快, Kenden已由細細粒長大咗好多喇!

希望你繼續快高長大, 做個活潑BB! 仲有就係夜晚早D瞓 (成日成 1點仲要扭一輪先肯瞓), 同埋你大個囝喇...唔該戒咗夜奶啦(時得時唔得)^^!!!